بلوچستان ءِ پلین شهیـدان ءَ هزاران سلام !

بلوچ کوم ءُ بلوچستـان ءِ یعقوب گون وتی همبل ءَ عبدالناصر، ایران ءِ کوردل ءُ زورانسرین حکومتی  رسترانی دست ءَ کشگ بوتنت.

اے  بے گناهین ورنا  بلوچستان ءِ شهیدانی کاروان ءِ هما وشبوئین پل اتنت که دگنیا ءِ سرجمین

 آزاتی لوٹین ءُ انسان دوستین مردمان چه آیانی شهادت ءَ پدرد ءُ سوگیگ بوتنت.   
شهید یعقوب ءُ آیی ء همراه بلوچ کوم ءِ ورنایانی معصومی ءِ درور انت.  اے بلوچ ورنا دگنیا ءِ بے گناهترین بندی اتنت. آهان مورے ءَ هم آزار نداتگت.  اے شهیدان  گون وتی پاکین  زند ءُ انساندوستی ءُ گریب دوستی کارکردان مان انسان ءُ انسانیت ءِ تاریخ ءَ ابدمان بوتنت..  آ گون وتی شیرکنین ءُ شهدین زند ءِ ندر کنگ ءَ بلوچ کوم ءُ درستین انسانان اے آسمانی گپ ءَ پدا ذگر کت :

 « تان یک کومے وت مه لوٹیت، پاکین الله آ  کوم ءِ تقدیر ءَ بدل نه کنت۰»                                                                                        

 

 ایران ءِ زالم ءُ رسترین حکومتی  انسانی حکانءُ بشری بن رهبندانی دژمن انت. اے شیعی ـ شونیستی حکومت نئے بلوچ کوم ءَ منّیت ءُ نئیکه بلوچانی
 انسانی حکّان. اے بلوچ کشین واکدار چه وتی حکومت ءِ  هما اولی روچان په بلوچانی بیگواه کنگ ءُ بلوچستان ءِ پُلگ ءَ وتی 
 شومین سیاستان بنگیج کرت. بزان شومپالین شاه ءِ شونیستی سیاستان ترند تر کت ءُ مذهبی زلم  بلوچانی سرا گیش بوت. مان همے بے درین حکومت ءِ قانون اساسی ءَ ایران ءِ  زورانسرین ملایان نبشت که:

 ایران ءِ تهنا شیعی ایرانی تواننت که ملک ءِ رئیس جمهور ءُ سروزیر یا وزیر به بنت.
 
بزگین بلوچ ءَ مان اے حکومت یا که ایران ءِ په زور اڈ کتگین ملک ءَ مستری یا که 
وزیری وَ نه رسیت که هچ، تهران ءِ زالمین ءُ نالائکین  شونیست آهانی زند ءُ  شپ ءُ روچان نگیگ
کرتگ. بلوچ ءِ پسگان همک روچ بید هچ جرم ءُ گناهے ءَ پاهو دینت. 

بلوچ ءِ بیگناهین اوبادگان تیر جننت یا که درنجنت. بلوچ ورنایان 
گون سنگدلی  دزگر ءُ کننت ءُ وتی سیاچاتان دور دینت ءُ آهان شپ ءُ روچ ازاب دینت. بلوچ ءِ جنکان

 دزانت ءُ بیگواه کننت.

 بلوچان شیعه کنگ ءِ چن ءُ لانچ انت. بلوچستان  ءَ پل انت ءُ بلوچ ءِ هستی ءُ  زند ءَ  برباد کنگ انت.
اے انسان دژمنین رستری حکومت درستین بلوچان وتی دژمن زانت. چه دانش آموز به بیت یا که
دانشجو، چه مولوی به بیت یا که دهکان، چه کارگر به بیت یا که وانینوک، چه تاجر
به بیت یا که گریب. ایران ءِ شیعی ـ شونیستی خبیثین واکدار هما زلم  بلوچانی سرا کنگ انت که مان مئی تاریخ ءَ  بے درورانت۔  آ زاننت که بلوچستان آهان زور برد کرتگ ءُ تان ابد آیانی پلیتین پنجگانی چیرا
نه مانیت. پہ همیش چه سال۱۳۵۸ ءَ بگر تان مرچی هزارانی هزار بلوچ گرگ ءُ بندی  بوتگ انت یا شهید کنگ بوتگنت، 

بازینے شکنجه ءُ ازاب دیگ بوتگ انت ءُ نامالومین حسابے انگتءَ مان بندیجاهان انت یا که ازابانی چیرا شهید بوتگنت. 

 

اے زالم ءُ رسترین واکدار ڈنی انت ءُ گون ما هما کننت که « علیءَ گون کاپران نه کتگ.»
مئی بے حسابین مشکل ءَ سکّی یانی بندر ءُ سوب ایش انت که مئی گلزمین، مئی ملک، مئی وتی  بلوچستان، بلوچانی بن پیرکی ڈیه  ڈنی دزّ ءُ رسترانی دست انت.       چه هما نالائکین رضا میرپنچ دور ءَ بگر تان اے خبیثین شیعـی ـ شونیستی          
بے درین واکداربلوچستان ءُ بلوچ کوم  وشی ءِ روچ ندیستگ.

اے رسترین دزّان گون لٹ ءُ پل ءُ په زانتین کارهرابیان ما را هچ بر موه نه داتگ تان وتی 

زندجاوران گهتر بکنین ءُ وتی ملک ءَ دیما به برین.

 آ لوٹنت که ما تان ابد آیانی ایر دست ءُ گلام بئین.ءُ مئی پلین
وتن ءَ مدام به گشنت: « استان محروم سیستان و بلوچستان» 
آ مئی اقتصادی، زبان، دود ربیدگی، علمی ءُ اجتماعی دیمروی ءُ ترقی ءِ دیمپان انت.

 
ما را سرپد بیگی انت که بلوچ کوم ءُ بلوچستان ءِ پد منتگی ءِ سوب ایش انت  که ما په زوراکی ءَ انگریز ءِ اڈ کتگین ایران ءَ هور کنگ بوتگین. بلوچ کوم ءُ بلوچستانءَ هچ نپ ءُ پائدگے چه 

ایران ءَ نه رستگ ءُ هچ برهم نه رسیت. 

ایران ءِ واکدار مدام مئی مال ءُ هستی ءَ پلتگ ءُ په وتی مردمان مان یزد، کرمان، اصفهان، شیرازءُ آدگه پارس منندین 

شهر ءُ کوچگان هرچ کرتگ.
آ مئی ملک ءَ وتیگی کتگ ءُ مئی جندءَ گار ءُ گمسار کنگ لوٹنت۔
تان اے بلوچ دژمنین رستری حکومت پروشت ءُ پروش مه بیت بلوچ کوم ءِ زند هال ءُ جاور  گهتر نه بنت. ما را تاریخی تجربه هان دلگوش گور کنگی ءُ   کارمرز کنگی اَنت.

تان بلوچ وت ءَ را تپاک ءُ سازماندهی مه کنت مئی مشکل ءُ سکّی یان کم نه بنت. 

بلوچ ءَ یک زورمند ءُ مردمدارین مچی پکارانت. هنچین مچی یا سازمان یا حزبے کہ 
مدرن به بیت. هما مچی مروچی پکارانت که په  بلوچستان ءِ آزاتی ءُ استقلال ءَ جهد بکنت.

ما را «کوهنین دپتران» چارگی ءُ وانگی انت تان «نوکین کسه اے» بیارین.
 دگه  ایرانیانی ایردستیءُ گلامی بس انت. ما شرزانین که ایرانی رسترین واکدار مارا گیش چه هشتاد سال برباد کتگ ءُ مئی  زند ءُ هستءَِ  نیستی ءُ زوال کنگ ءِ لانک اش بستگ. 

دگه ایران ءُ ایرانی ءِ ایردستی بس انت.

محمد کریم بلوچ